Ona tili - millatning mangu hayot manbai va ma’naviyat sarchashmasi

✍️ Insoniyat tarixining qaysi sahifasiga nazar tashlamaylik, har bir millatning o‘zligi, ruhiy olami va tafakkur tarzi, avvalo, uning tilida namoyon bo‘lganiga guvoh bo‘lamiz. Til shunchaki tovushlar majmuasi yoki o‘zaro muloqot vositasi emas, balki millatning o‘tmishi, buguni va kelajagini bog‘lovchi ma’naviy ko‘prik, milliy o‘zlik va mustaqillikning muhim ramzidir.
O‘zbek tili bugungi yuksak maqomiga osonlikcha erishgani yo‘q. Uning bosib o‘tgan yo‘li ziddiyatlar va sinovlarga boy. Sobiq ittifoq davrida milliy tilimizning ijtimoiy hayotdagi mavqei cheklanib, rasmiy idoralar, ilm-fan va boshqaruv sohalarida rus tilining ustuvorligi kuzatildi. Bunday sharoitda ona tilimizning mavqeini tiklash, uni davlat tili sifatida e’tirof etish yo‘lidagi sa’y-harakatlar milliy o‘zlikni anglash jarayonining muhim qismiga aylandi. Xalqimiz va ziyolilarimizning sa’y-harakatlari natijasida 1989-yil 21-oktabrda "Davlat tili haqida"gi Qonun qabul qilindi. Bu tarixiy voqea milliy o‘zlikni anglash va mustaqillik sari intilish yo‘lidagi muhim qadamlardan biri bo‘ldi.
🗣 Bugungi kunda o‘zbek tilining davlat tili sifatidagi mavqeini mustahkamlash, uning xalqaro miqyosdagi nufuzini oshirish hamda barcha sohalarda keng qo‘llanilishini ta’minlashga alohida e’tibor qaratilmoqda. Ona tilimizning xalqaro maydonda tanilishi, ilmiy va madaniy aloqalardagi ishtirokining kengayishi uning zamonaviy dunyodagi o‘rnini yanada mustahkamlashga xizmat qiladi.
O‘zbek tili boy lug‘at tarkibi, nozik ma’no qirralari va betakror ohangi bilan ajralib turadi. Buyuk mutafakkir Alisher Navoiy o‘zining "Muhokamat ul-lug‘atayn" asarida turkiy tilning keng ifoda imkoniyatlarini asoslab, uning badiiy va ilmiy salohiyatini namoyon etgan. Biz so‘zlashayotgan til - hazrat Navoiyning g‘azallari, Zahiriddin Muhammad Boburning she’riyati, Abdulla Qodiriyning romanlari orqali asrlar osha yetib kelgan bebaho ma’naviy xazinadir.
Zamonlar o‘zgarishi bilan til oldidagi talablar ham yangilanib bormoqda. Bugungi kunda o‘zbek tilini nafaqat adabiyot va san’at, balki zamonaviy ilm-fan, innovatsiyalar va raqamli texnologiyalar sohasida ham keng qo‘llash muhim vazifalardan biridir. Ilmiy atamalarni o‘zbek tilida aniq va tushunarli ifodalash, zamonaviy texnologiyalar sohasida milliy til imkoniyatlaridan samarali foydalanish uning rivoji va zamon bilan hamnafasligini ta’minlaydi.
Ona tili - onamizning allasi, bolaligimizning eng samimiy sadosi, milliy qadriyatlarimiz va ma’naviyatimizning ajralmas qismidir. Uni asrash, rivojlantirish va kelajak avlodga boyitilgan holda yetkazish har birimizning sharafli burchimizdir. Buning uchun tilimizning sofligiga e’tibor berish, so‘zlarni o‘rinli qo‘llash, imlo va adabiy til me’yorlariga rioya qilish, ona tilimizning ilm-fan va kundalik hayotdagi qo‘llanish doirasini kengaytirishimiz lozim.
Zero, til yashasa - millat yashaydi, til rivojlansa - millatning ma’naviy salohiyati yuksaladi. Ona tilimizni e’zozlash, uning boy imkoniyatlaridan samarali foydalanish va uni kelajak avlodga munosib yetkazish barchamizning muqaddas mas’uliyatimizdir.

✍ Tayyorladi: taʼlim muassasasi talabasi M.Muhammadnabiyeva‌‌

✏️ Mas'ul: ta'lim muassasasi matbuot kotibi M.Mamadaliyeva