АРПА НОНИ МЎЖИЗАСИ

Оиша розияллоҳу анҳодан ривоят қилинади, у зот айтдилар: Расулуллоҳ соллаллоҳу алайҳи васалламни ҳақ билан юборган зотга қасамки, У зот пайғамбарликларидан то вафот этгунларигача ҳеч қачон элакни кўрмаганлар, эланган ундан тайёрланган нонни ҳам емаганлар. Шунда Урва: “Арпа нонини қандай егансизлар?”, деб сўради. Оиша розияллоҳу анҳо: Пуфлаб тозалар эдик”, деб жавоб бердилар[1].

Саҳл ибн Саъд розияллоҳу анҳудан ривоят қилинади, Абу Ҳозим у зотдан: 

• Пайғамбаримиз соллаллоҳу алайҳи васаллам замонларида оқ нон кўрганмисизлар?, деб сўради.
• Йўқ, дея жавоб бердилар Саҳл ибн Саъд розияллоҳу анҳу. Абу Ҳозим:
• Арпани элакдан ўтказармидингиз?, деб сўради. Саҳл:
• Йўқ, балки уни пуфлаб тозалар эдик, дедилар. Абу Ҳозим:
• Расулуллоҳ соллаллоҳу алайҳи васаллам оқ нон еганмилар, деди. У зот:
• Аллоҳ таоло У зотни пайғамбар қилиб юборганидан то вафотларига қадар оқ нон емаганлар, деди. Абу Ҳозим:
• Расулуллоҳ соллаллоҳу алайҳи васаллам замонларида элаклар бўлганми?, деб сўради. Саҳл розияллоҳу анҳу:
• У зот ҳаётлари давомида элакни кўрмаганлар”, деб жавоб бердилар[2].

“Оқ нон” – тегирмондан бир неча марта чиқариш билан оқартирилган ундан тайёрланган нондир. 

Анас розияллоҳу анҳудан ривоят қилинади: “Расулуллоҳ соллаллоҳу алайҳи васаллам ҳаётлари давомида ҳеч қачон тегирмон унидан тайёрланган нонни кўрмаганлар”, деб айтдилар[3].

Абу Дардо розияллоҳу анҳудан ривоят қилинади, у зот: “Расулуллоҳ соллаллоҳу алайҳи васаллам учун ҳеч қачон ун эланмаган”, деди[4].

Ушбу ҳадиси шарифларда Расулуллоҳ соллаллоҳу алайҳи васаллам кепаксиз, тоза, эланган ундан тайёрланган оқ нон емаганларини, балки бошқаларни ҳам бундан қайтарганларини билдик. Бунинг сабаби нима? Илмий асос буни қўллаб қувватлайдими?

Америкалик биокимёгар олим Прасад ўзининг “Нозик металларнинг озуқавий клиник кўринишлари” китобида қуйидагиларни келтирган:

1958 йил Эроннинг Шероз шаҳридаги шифохонада ишлаганман. Бир куни олдимга ёши йигирма бирга кирган бемор келди. Мен уни ўн ёшлар атрофида деб гумон қилгандим. Уни бўйи паст бўлиб, камқонлик, жигар ва талоқ катталашиши, териси қуриб қолиш касаллигига чалинган эди. Ундан нима ейииши ҳақида сўрадим. У доимо олий навли оппоқ ундан тайёрланган нон еяр экан. Бир неча ой орасида ўша бемор каби касал бўлган кишиларни текширдим. Ваниҳоят бунинг сабабини топдик. Уларнинг барчаси фақат оқ ундан тайёрланган нон ейишгани сабабли қондаги руҳ моддаси камайиб кетган экан[5].

Доктор Лион шундай деган: Оқ ундан тайёрланган нон ўрнига қора нон ейиш билан инсон танаси учун энг зарур бўлган руҳ моддаси меъёрига келади ҳамда уни камайиши ортидан пайдо бўладиган касалликлардан омонда бўлади[6].

Ушбу ўринда Расулуллоҳ соллаллоҳу алайҳи васаллам оқ ундан тайёрланган ноннинг инсон учун қандай зарарли эканини айтиб ўтганларини орадан ўн тўрт аср ўтгач ўрганиш ва замонавий тадқиқотлар натижаси энди исботлаб бераётганини кўрмоқдамиз.

Расулуллоҳ соллаллоҳу алайҳи васаллам Аллоҳ таоло пайғамбар қилиб юборганидан то вафотларигача эланмаган ундан тайёрланган нон еганлар. Биз-чи, қора нонни қўйиб, фақат оқ нон еймиз, ваҳоланки, қора нонда Аллоҳнинг фазли билан кўплаб фойдали моддалар борлигини биламиз!

Шундай экан мусулмон киши Расули акрам соллаллоҳу алайҳи васалламнинг суннатларига эргашиш дунё ва охиратда манфаатли бўлур. 

                                                                                                                                                                                                                     тайёрлади М.Ходжаева.

[1] Имом Аҳмад “Муснад”да (6/71), Имом Термизий “Шамоил”да (145-ҳадис)  ривоят қилишган.

[2] Имом Бухорий  “Саҳиҳи Бухорий”да (5410, 9/459), Имом Термизий “Сунани Термизий”да (2469), Имом Ибн Можа “Сунан”да (3335) ривоят қилишган.

[3] Имом Бухорий  “Саҳиҳи Бухорий”да (5385, 9/440), Имом Термизий “Сунани Термизий”да (2468), Имом Ибн Можа “Сунан”да (3335) ривоят қилишган.

[4] Имом Табароний “Авсат”да ривоят қилган.

[5] Прасад ўзининг “Нозик металларнинг озуқавий клиник кўринишлари” китоби.

[6] Ҳассон Шамсий Пошшо. “Набавий тиббиётдан парчалар” китоби 215-219 саҳифалар.