Yangi hayot uchun — Yangi Oʻzbekiston uchun

1989-yil 21-oktyabr — o‘zbek xalqining tarixidagi unutilmas sana. Aynan shu kuni O‘zbekiston Respublikasida o‘zbek tiliga davlat tili maqomi berildi. Bu voqea millatimizning ma’naviy uyg‘onishida yangi sahifa ochdi, xalqimizning o‘zligini anglash va milliy g‘ururni yuksaltirishda muhim qadam bo‘ldi. Til — millatning ruhi, o‘zligining belgisi, uning tarixiy xotirasidir.

Bugun esa biz “Yangi hayot uchun — Yangi Oʻzbekiston uchun” degan ezgu gʻoya ostida yashamoqdamiz. Bu shior xalqimizni yangicha tafakkur, yangicha hayot sari chorlamoqda. Yangi Oʻzbekiston — bu inson qadri ulug‘langan, adolat, taraqqiyot va bunyodkorlik yo‘lidan borayotgan yurt demakdir.

Ona tilimiz bugun ilm-fan, ta’lim, madaniyat va texnologiya sohalarida keng qo‘llanilmoqda. Bu esa xalqimizning o‘z tiliga bo‘lgan ehtiromi va ishonchining yaqqol ifodasidir. Biz, yoshlar, o‘z bilimimiz va mehnatimiz bilan shu ishonchni oqlashimiz, Yangi Oʻzbekiston ravnaqiga hissa qo‘shishimiz lozim.

Ona tiliga hurmat — Vatanga hurmatdir. Tilini asragan xalqning kelajagi porloq bo‘ladi. Shunday ekan, biz har bir ishimizda “Yangi hayot uchun — Yangi Oʻzbekiston uchun” gʻoyasiga sodiq qolamiz va o‘z ona tilimizni doimo ardoqlaymiz.

Muallif: 1-kurs talabasi Fotima Soyibjonova